ភ្នំពេញ៖ អគ្គមេបញ្ជាការរង និងជាមេបញ្ជាការកងទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានកោតសរសើរចំពោះការលះបង់របស់ទាហានជើងគោកទូទាំងប្រទេសដែលបានខិតខំប្រឹងប្រែងរួមគ្នាបំពេញតួនាទី និងភារកិច្ចដែលដាក់ជូន ជាពិសេសគឺការចូលរួមយ៉ាងសកម្មក្នុងការប្រយុទ្ធប្រឆាំងនឹងជំងឺកូវីដ-១៩កន្លងមកនេះ។ លោកបន្ថែមថាក្នុងឆ្នាំ២០២២នេះ ទោះបីធូរដៃខ្លះ តែកម្ពុជានៅមានកិច្ចការជាច្រើនទៀតដែលត្រូវបំពេញដែលមានដូចជាការដឹកនាំអាស៊ាន និងការបោះឆ្នោតក្រុមប្រឹក្សាឃុំ សង្កាត់ឆ្នាំ២០២២។

លោកបានបញ្ជាឱ្យស្ថាប័នកងឯកភាពចំណុះកងទ័ពជើងគោកទាំងអស់ត្រូវត្រៀមលក្ខណៈអនុវត្តភារកិច្ចតាមបទបញ្ជារបស់រាជរដ្ឋាភិបាល ដូចជាចូលរួមសហការការពារសន្តិសុខ សណ្តាប់ធ្នាប់សាធារណៈ ជាមួយគ្រប់ស្ថាប័ន-អង្គភាព និងអាជ្ញាធរពាក់ព័ន្ធ ជាពិសេសការការពារសន្តិសុខ សុវត្ថិភាពជូនថ្នាក់ដឹកនាំជាតិ អន្តរជាតិ ក្នុងដំណើរការនៃកិច្ចប្រជុំនានា ដែលកម្ពុជាធ្វើជាម្ចាស់ផ្ទះក្នុងនាមជាប្រធានអាស៊ាន ក៏ដូចជាដំណើរការឃោសនានិងការប្រព្រឹត្តទៅនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ និងត្រៀមសម្រាប់ប្រតិបត្តិការជួយសង្គ្រោះគ្រោះមហន្តរាយជាយថាហេតុផ្សេងៗ បន្តការយកចិត្តទុកដាក់លើជីវភាព និងការលំបាកផ្សេងៗរបស់គ្រួសារយោធិន និងអតីតយុទ្ធជន។

កម្ពុជាបានក្លាយជាប្រធានប្ដូរវេនអាស៊ានជាលើកទី២នៅឆ្នាំ២០២២នេះ ការដឹកនាំអាស៊ាននឹងត្រូវរៀបចំកិច្ចប្រជុំក្នុងក្របខ័ណ្ឌអាស៊ាននានាដែលមានមេដឹកនាំជាន់ខ្ពស់ និងប្រមុខរដ្ឋនៃប្រទេសជាមួយចូលរួម នៅឆ្នាំដដែលនេះផងដែរកម្ពុជាក៏នឹងរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ដែលនឹងចាប់ផ្ដើមនៅថ្ងៃទី០៥ ខែមិថុនា ឆ្នាំ២០២២៕